Mit Hürdä verbundä

Das Motto der 187. Legorenfasnacht ist bekannt, folgender Ausschnitt aus Hans Kuony’s Plöder erklärt es euch aus erster Hand.

„Mit dä Pandemie isch mängs mit Hürdä verbundä gsi, da fallt mer grad s’Motto zu dä hüürigä Fasnacht i.

Das hani mit em vorhärigä Färs grad gfundä, heissä duets: „Mit Hürdä verbundä“.

Passä duet das zu so mängem Thema aktuell, z. B. chönd jetzt hüürattä all öb hetero-, homo- oder bisexuell.

Eine vo dä Hauptgründ isch aber dä planti Stäg zwüschet Ober- und Unterägeri, wo mit ganzä hufä Hürdä vor dä Bootshüüser verbundä wird si.

Wies ersichtlich isch uf dem Projektplan, gids en Art Bärg und Talbahn.

Denn vor jedem Bottshüttli, gäbs es Bogäbrüggli.

Vo mir us gseh isch mer mit dem Fuessgängerstäg, nu ziemlich uf em Holzwäg.

Für dä Natur- und Landschaftschutz hätt ich en besseri Idee und zwar en glesigä Tunnel uf em Grund vom Ägerisee.

Ich bi überzügt das wär sicher irgendwie z’lösä und Korporation Unterägeri chönd, bi gnueg Wasser, ihres Holz unbehindert zu ihnä abä flössä.

Das mini Idee für die plant Verbindig vo denä zweh Gmeindä, ganz ohni Hohn, zudem gäb das sicher en top Turischtä-Attraktion.